Dispensa

ni Jose F. Lacaba

Humihingi ako ng tawad

Sa mga kritikong walang patawad

Na nagsasabing

Walang sinabi

Ang kasalukuyan kong berso

Kumpara sa mga hiyas na nilikha ko noong bata pa ako.

Ang noon

Ay bahagi na raw ng tinatawag nilang canon –

Pero ang ngayon

Ay naubusan na raw ng inspirasyon,

Mga dighay sa dilim

Ng isang palaging binabagabag

Ng kabag.

Ang ibig sabihin

Ng canon ay ito:

Ang lumang obra maestra mo

Ay muli’t muling

Inilalathala sa mga teksbuk

Nang walang bayad at walang pahintulot,

At kulang-kulang ang mga taludtod,

At maraming linyang mali

Ang bali,

At – ang lalong kalunos-lunos –

Pinagtatanggal ang lahat ng parteng bastos.

Masarap sana ang canon

Kung pwedeng ipambili ng ulam at kanin